貴價茶餐廳翠華今日喺金鐘某酒店做投資者推介，打算去食番餐嘅分析員或者芬佬，唔好諗住有得食翠華名物奶油豬、瑞士雞翼，係就要自己畀錢幫襯番翠華，但臨走應該可以攞番隻笑笑口奶茶杯走嘅。
機場又開分店
咪以為翠華係茶餐廳就求求其，佢個網站係有「十大名菜」一欄，名菜包括文昌雞、熱狗、魚蛋河粉、瑞士雞翼、奶茶等，好鬼認真，直情將本港地道茶餐廳文化推上另一層次，包括價錢。咁啱翠華喺機場第二間分店近日開張，第一間兩年前開嘅，新店地方相當大，有成萬二呎，340個位，旅客出入機場想食茶餐廳出品好方便。不過咁，香港茶餐廳實在太多，而且越街坊越有感情，翠華可唔可以就咁就代表香港嘅茶記呢？