晶剛大婚嘅豪門夜宴，噚日終於喺香港上演，霍家包起灣仔會展三樓宴會廳，據悉筵開150席，曾鈺成、劉慧卿等政界人士都有到場。「港女500」引發婚宴人情風波，可能大家都怕惹是非上身，一聽到記者問「人情」兩字已起晒槓；好似立法會議員馬逢國話：「呢啲嘢唔需要交代喎，我只可以講好戥對新人高興。」前民政事務局常秘「媽打」李麗娟就笑住話封咗利是仔，唔肯講有幾重手，只肯講佢當官時已認識晶晶，而新奶奶朱玲玲更加識咗幾十年。現場所見，賓客多數兩手fing fing，應該畀人情多過送禮物。相信晶晶唔會介意賓客封幾多人情，況且註冊及兩晚婚宴聽講花咗成三千萬，收幾多人情都好難唔蝕啦。都係嗰句，擺酒最緊要開心。一對新人下午5點出嚟畀記者影相，晶晶着嘅晚裝「晶」光閃閃。
300蚊利是 人仔變港幣
賓客封幾多人情不得而知，但主人家就繼續向記者大派利是，同南沙婚宴一樣，都係封300蚊；但當晚係人仔，噚晚就係港幣，咁咪變相縮水？行家們唔收利是都得，但就希望可以近距離採訪囉，可惜會展嚴陣以待，用圍板重重包圍記者喺地下大堂，封鎖部份升降機、通道，保安嚴密。