【本報訊】未到聖誕，但新一代港產聖誕老人經已面世。年僅20歲的Santa Rainbow將於明天代表香港飛到瑞典，單挑七個不同國家的聖誕老人，爭奪第9屆國際聖誕老人運動會冠軍。惟這個扮得似模似樣的小伙子，背後藏着一段不快的童年，令他不善辭令，要靠扮鬼扮馬重拾生命色彩。記者：馮詩媚 陳兆剛
「呵呵呵呵！聖誕老人嚟喇！」20歲、高高瘦瘦的何永亮，雖沒有老態龍鍾的身形，但每當掛起長白鬍子、髹上白眉、戴上白色假髮，再穿上紅色聖誕老人服和紅帽子，旋即「聖誕老人上身」，摸摸鬍子、搓搓肚腩，做出多個搞笑表情。
卸下化妝判若兩人
早前他擊敗七名對手，贏出香港聖誕老人選拔賽冠軍，是歷來最年輕的香港代表，明天將出戰瑞典，與來自七個不同國家的代表比賽，爭奪第9屆國際聖誕老人運動會冠軍。變魔術、扭氣球、扮小丑，他樣樣皆能，是個出色表演者，但每當他卸下化妝、脫下戲服，隨即判若兩人，變成一個不懂說話、不善溝通的「怕醜男」。「嘅……嘅……唔識點同你講……」Rainbow就像舌頭打結，頭部不由自主地扭來扭去，花盡九牛二虎之力，也難以完整說出一句話。自覺患上語言障礙Rainbow坦言，全因6歲時的不愉快童年經歷，「細個時我成日吱吱喳喳，父母就會鬧，唔畀我講咁多嘢……如果喊，就會俾人鎖喺廁所，直到唔再喊先放返出嚟！」他直言家教嚴苛：「之後我就好少講嘢，唔開心都收埋，唔敢畀人知。」對於所有家事他都隻字不敢提，只透露有個妹妹，平日甚少跟家人溝通。渾渾噩噩八年，終在中二參加學校的魔術班認識導師Mario（高添羽，2011年國際聖誕老人運動會季軍），從此改變他的一生。「我學嘢一向三分鐘熱度，但魔術好吸引我，因為每一步都唔會諗到」。他立即向Mario拜師，中五畢業後更全職投入表演行業。
第一次上台唔怯場
「佢14歲嗰年嘅萬聖節夜晚，我叫佢戴面具上台扮一分鐘德州電鋸殺人狂，結果佢玩咗3分鐘，第一次上台唔怯場，仲贏得觀眾掌聲，嗰刻我就知佢係食舞台飯嘅人」。師傅Santa Mario六年來把他提攜成材。就連Rainbow也不明白：「平時同人溝通唔到，但換衫化妝後，就變咗另一個身份。變身後易咗同人溝通，我好享受受歡迎嘅感覺。」他甚至不落妝、不換戲服去搭車，「啲人見到我都幾開心，我鍾意同小朋友玩，佢哋笑容同笑聲好純真，唔似啲大人咁複雜。」他希望把歡樂帶給所有人，就像他的英文名「Rainbow」，充滿色彩。
