唔少喺選舉幫過狼振英嘅要員，已經搵到頭好住家。前亞視主播洪綺敏去咗香港中國商會做副總幹事，曾任狼振英公務助理嘅馮英倫就去咗南旋集團，擔任主席王庭聰嘅助理。八方見到馮英倫張新卡片，真係覺得佢好「紅」；事關呢位前港大學生會外務副會長，原來亦係全國青聯、廣東省青聯以及雲南省青聯嘅委員。馮英倫服侍嘅王庭聰係乜水？當然係中共「紅」人，佢有次出席立法會政改諮詢會，表明「非常反對直選」，「台灣夠民主啦，美國、法國夠民主啦，選咗啲乜嘢總統出嚟？咪選咗啲垃圾出嚟」，連當時身在現場嘅民建聯劉江華聽完都話唔認同呢番言論。八方聽聞王庭聰有意選港區人大，唔知阿爺會唔會「關照」佢呢？