「做水上人，日日都咁辛苦！」郭父說。「所以我3個仔女，千祈唔好做漁民！」郭母說。於是，有份帶領香港欖球隊成亞洲「1哥」的郭嘉進，19歲讀完毅進後立刻考消防；一為脫貧，二為欖球。明年他與拍拖10年的未婚妻共諧連理，夢想是拖兒帶女衝擊兩年後的亞運金牌。記者/攝影：徐嘉華
憑拉錨變高大威
嘉進高1米83、重97公斤、44吋巨胸，魁梧身形冠絕香港7欖隊，連外籍隊友也要靠邊站；他說多得兒時在艇上生活有關：「我細個時又瘦又細粒，出世到小學都住在艇上，之後雖然搬上岸，但一放假就落船幫阿爸阿媽手；佢哋落網捕魚，我就負責拉錨，好多小朋友嘅童年喺冒險樂園，我嘅就喺漁船。」
此時，在艇上的郭母也忍不住要讚讚這位獨子（他有1姐1妹）：「佢11、12歲就幫我拉錨，要好大力同動作好快先拉得到。」嘉進小時候家貧，連去麥當勞都屬奢侈品，一家人幾年才有一次機會搭車出彩虹食漢堡包，每次都會開心好幾天。他兒時唯一娛樂就是與朋友仔通山跑及游水；從而練出高大身形。郭家幾代水上人，包括爺爺及太公都是西貢水上人，近期父母已很少捕魚，轉型「旅遊業」，載客人在海上到處遊覽。
消防造就欖球夢
嘉進好幸運，19歲成功考入消防，一直駐守西貢；原來更幸運是，這工作是他兒時夢想。郭母說：「個仔一識講嘢，就話大個要做消防叔叔。」嘉進說：「我也想過做警察，但唔啱我耿直嘅性格，做消防聽order後就去執行，同打欖球一樣。更重要是，消防員返一日放兩日，令我有更多時間打欖球同練體能。」
在旁的未婚妻Coco就半說笑半埋怨：「佢放假嘅時間都去打欖球，大假幾乎用嚟比賽，等佢退役後，一定要將時間還畀我。」
嘉進的欖球生涯從16歲開始。當時中四的他，就讀西貢崇真天主教中學的欖球隊成績驕人，在師兄拉攏下接觸rugby，06年更第1次參加大球場的香港國際7人欖球賽；之後因為剛加入消防，怕過不了試用期，於是放下欖球3年，還好趕得及2009東亞運及2010亞運奪取雙銀。
怕醜仔明年結婚
嘉進及Coco已決定明年9月結婚，順道紀念拍拖10周年。自小住在港島區，亦曾玩過學校欖球隊的Coco，當初是被嘉進憨直及怕醜的性格吸引；任職美容的Coco說：「我哋喺校際欖球賽認識，佢畀我第一個印象係好怕醜，唔會口花花，覺得佢好得意，好想識佢。」嘉進已打算明年婚後，會順其自然生兒育女，更視消防為終身職業，就算明年初香港7欖成為體院「精英項目」，也不會轉做全職欖球員；他說：「婚後我要更顧慮另一半，希望對家庭有承擔及保障，所以欖球打到2014亞運就夠了。」
後記 郭家有妹初長成
比嘉進細13年的妹妹郭文靜，除身形同樣高大外，得14歲的她亦獨愛欖球，同哥哥一樣是西貢崇真天主教中學欖球隊主力，不少欖球隊教練已對她虎視眈眈。嘉進希望自己退役後，可以由妹妹繼續為郭家爭光。
郭嘉進小檔案
花名：狗仔（因為於農曆九月初九出世）
年齡：22/10/85（27歲）
身高：1米83
體重：97公斤
職業：消防員
球齡：11年
位置：支柱
效力球會：DeA Tigers（第一猛虎）
威水史：
11年滙豐亞洲7欖系列3站獲兩冠一亞，奪「亞洲第1」
10年廣州亞運銀牌
09年香港東亞運銀牌