成日話性格影響命運，入行八年才真正擁有人生第一個演唱會的周國賢，好大可能是因為他愛享受過程大於目的、唔怕兜大圈的性格，好一副你急佢唔急的模樣，「目的地？始終會到嘅！」一直恨換新車的他，目標是SUV，揸車最享受的亦是跟家人四圍兜圈。
記者：許維雅 攝影：譚盈傑
換車要做型爸爸
即使路途比同期出道的歌手漫長，周國賢（Endy）語氣並無半點怨氣，樂天知命的性格更令他猶如一個大細路，「演唱會主題是Let's Play Together，我想大家一齊玩，唔係嚟睇我表演，我仲會入行以來第一次跳舞，諗起都搞笑好玩。」Endy揸緊部舊款凌志IS250超過六年，借來全新RX450h讓他試駕，大細路再次上身，「好香呀！啲新車皮味真係要聞多幾下，好想換車呀！嘩！個天幕咁壯觀、呢個好似滑鼠咁得意、呢個投射幾得意喎、我今日先知咩叫混能……我覺得自己部車好似古董咁。」創新配備令Endy如此興奮，皆因Ultimate版RX450h的豪華程度勝過不少同級，包括八吋輕觸式顯示屏連第二代遙控觸感操控儀、多功能投射顯示屏、Semi-aniline皮椅及全景天幕頂等。加上系統總輸出達299匹馬力，載滿一家都唔怕唔夠力喺斜路特多的南區遊車河啦。
自言恨換車，目標亦是以家庭行先，「我想揀尺碼大少少的SUV款式，載住一家人周圍去可以坐得舒服啲，我又可以型，唔似其他七人車外形較笨！如果有七座Audi Q7就更好啦，空間再鬆動啲。」
遲來的第一次
好多時睇一個人點揸車，就好容易睇得到一個人的潛在性格。已是三女之父的Endy屬於慣性司機，屬於唔愛飆車但無車代步唔得嗰種，平日最愛揸車上山跑步，假日娛樂便是一家人遊車河，「細個時，爸爸好喜歡星期日飲完茶就載我哋周圍去一啲偏遠地方玩，坐車途中聽住歌望住出面啲風景已經覺得好舒服，所以家我都習慣星期日遊車河，揸車一家人去兜個圈。佢哋？瞓晒囉，哈哈，仲好，可以靜吓！不過，只要大叫到沙灘喇，成班又即刻生猛晒！」Endy如此享受揸車的過程，所以每次寧願兜大圈都唔想塞車。至於他的事業，似乎亦貼合他的揸車態度，由八年前出第一張EP，到今年十二月尾先有第一個以售票形式舉辦、屬於自己的大型演唱會，呢條路會唔會遠咗啲呢？
「我個人嘅節奏係咁，可能好多同期已經開過紅館，不過，我寧願揀一條自己想行嘅路，我唔怕兜得遠，最重要係享受過程，我享受家做緊嘅音樂。目標遠啲唔緊要，我覺得目的地始終會到嘅。」
Check！ 新車點駁電？
Endy第一次接觸Hybrid系統，不單驚嘆着揸車時的寧靜，更直言有點唔習慣。打開頭冚想窺探一下混能引擎時，就爆了一句引來全場大笑：「我想問過江龍夾邊度呀？」新一代豪華車系為求美觀，大部份會以引擎保護蓋幾乎遮蓋引擎，要駁電點算？呢啲情況最好等待支援，尤其這類混能車電壓大，切勿自己胡亂接駁。
Lexus RX450h Ultimate
引擎：3,456cc V6配電動馬達
馬力：248PS/6,000rpm（系統總輸出299PS）
扭力：317Nm/4,800rpm
傳動：E-CVT電控無段變速，四驅
售價：$791,600（已扣除環保稅）
查詢：2511 9430（Lexus HK）
