香港人為樓價喋喋不休，起碼已有二十年歷史，彭定康當政年代，樓市有升有跌（1994年係跌市），在1997年七、八月亞洲金融風暴發生前，一路有升冇跌，直闖高峯，之後撞啱（一）回歸推行新政八萬五；（二）金融風暴（1997-1998）；（三）科網股爆破（2000）；（四）沙士（2003），一共四大因素，樓市大跌，幾乎一沉不起，嚇到董先生面青，卒之憑2002年第四季推出孫九招，開始嚴限土地供應，不建居屋，再加上2004年開始有自由行，於是樓市在低谷企穩，隨後反彈上升。2008年第四季有金融海嘯，各國大印銀紙，美國尤甚，大量熱錢推動下，香港樓價由2009年下半年開始起如脫韁之馬，向前狂衝，卒之在今年突破1997年之樓價巔峯，中原城市領先指數創歷史新高，樓市十五年風水輪流轉，建華八年向下，蔭權七年向上，振英元年破頂。
有人話，十五年咯噃，中國經濟體積比1997年龐大得多，十五年前內地人極難在港置業，現在內地人來港買樓，稀鬆平常，樓價創新高理所當然。更有甚者，1997年底之M3係28268.1億港元，銀行總存款有26657.3億港元，到咗2012年9月，M3有86006.2億，銀行總存款有79400億，增幅達3倍以上，加埋每年私人住宅供應量逐年下降（此乃孫九招矯枉必須過正之故），樓價有乜理由唔升破97高價吖。仲有一樣，1997年平均最優惠利率係8.83%，三個月同業拆息率係平均7.12%，而2012年之最優惠利率係5%至5.25%，三個月同業拆息低至0.65%以下。借按揭供樓息率低於通脹率，即係話扣除通脹後，借錢唔使俾息之餘，而且有賺。
睇完上述數字，再睇財政司長曾俊華之近日網誌，成日話目前本港樓價與經濟實際背馳，係市場失效先兆，都唔知佢講乜！曾司長做財爺已超過五年，請問佢從乜嘢經濟學課本可以搵到在下列情況下，樓價唔升嘅理論：（一）政府帶頭削減樓宇供應；（二）利率低至近乎零，實質按揭利率係負數；（三）貨幣供應大增；（四）開放經濟體系/小島經濟體位於世界第二大經濟體隔鄰；（五）小島不能實施外匯管制，資金自由進出，否則形同自殺。
為今之計，政府必須大量增加土地供應，先至合乎道理。