剛過去嘅歐聯分組賽，蘇超球隊些路迪爆冷以2:1擊敗地上最強嘅巴塞，些路迪全場只有5個射門，相反巴塞就有25次起腳，足足係對手嘅5倍，控球指數更加去到84%，即係超過75分鐘都係有波在腳。那又如何？最後全取3分嘅係些路迪。其實呢個結果，周不時會出現喺股票市場，即係一個升浪贏足八成，但只要有一兩日大調整，隨時輸凸。好似最近美國大選後嘅調整，殺咗唔少戰友一個措手不及，更加反映控制注碼嘅重要性。講番心水股，戰友不妨留意CEC國際（759），呢隻主力產銷電子及電器產品線圈嘅工業股，憑賣零食兼對抗地產霸權嘅759阿信屋成名，近期股價反地心吸力，上周四恒指插水500幾點，佢竟然企硬唔跌，上周五更搶高9%，收市價逼近今年高位，成交亦配合，唔排除有後着。事實上，之前傳阿信屋有機會分拆上市，加上CEC市值5億銀唔夠，炒作空間隨時大到你唔信，戰友不妨望多兩眼。唐牛