重慶機電（2722）主打瓣數係國策受惠行業，仲未向上爆，有得諗。重機主打商用車零部件、包括水力發電嘅電力設備，及電線電纜產銷。呢期十八大焦點之一，係繼續支持低碳潔能行業，加埋汽車工業又係阿爺重點支持行業。隨住新領導接班，相信好快有支持政策出籠，重機係受惠者。
又集團2012年年度，中期純利雖則倒退兩成到3.1億銀人仔，但股價貼近三年低位，往績PE得4.7倍，就當全年都倒退20%，PE都係5.8倍咁大把，股價已經反映不利因素。連埋祖國經濟再上軌道，加埋政策效應，重機2013年度Turn around，PE分分鐘又係得4倍幾。呢轉先炒政策市，博集團上番NAV 1.68元，現價（1.17元）要升40%，PE未有耐到雙位數。
勤達等待大爆發
勤達集團（1172）係禾稈冚珠珍類，又係等爆。集團手頭揸住廣東墓園項目，齋計現有518畝土地，可供發展1.8萬幅墓地及21萬個壁龕，以項目高、低位平均價計，潛在銷售額高達60億銀樓上，打個五折純利都30億銀，勤達家陣市值3億都唔夠，不得了！買勤達博翻半番，到0.20元，亦係未有耐上到NAV 0.25元。
錢雋