足球和政治是男人能公開討論的兩大話題，上周最難忘的兩幕也是此中尋，第一幕發生於曼聯對阿仙奴的半場，不是那位兵工廠小子要求尹佩斯換波衫的天真，而是尹佩斯走近雲格與他握手那一幕。
又一個孩子長大了！
大人教細路成日話要設身處地為其他人着想，達人教大人呢就話要win-win，諗自己之前先諗吓人，呢個道理要真係入腦，最好方法莫過於身體力行變換身份。未轉會前嘅尹佩斯好多言行都係好閃縮，好似做咗啲乜唔見得人咁，真係走咗嘞，諗番轉頭雲格確實係恩師，於是主動行埋去握握手，除咗門面工夫打個招呼之外，有留意到佢握完手仲拍咗雲格肚腩仔兩吓嗎？呢啲動作親切得嚟有啲心照，是感恩還是祝福，或者兩樣都有！一般嚟講，通常呢啲動作都係長輩向後輩先會做，老細向下屬都會，以下犯上就好少，一個小動作，足以反映尹佩斯大個仔。日本人以前興一世人打一份工，係穩陣，但係奴性太重。有機會轉吓工的話，你一定要搵吓舊老細聚舊，當關係「由上而下」變為「咁高咁大」時，你會發現你以前成日仰望嗰位原來未必係咁乞人憎；我就分別響以往嘅老細身上，發現到大細路、同學仔以及老朋友嘅特質，當角度有所變化，關係都會keep得好啲，我係未試過拍佢哋肚腩啫。長大總是不知不覺的，一轉身遇着舊老闆，碰上舊情人甚至對戰舊隊友，明白對方嘅同時，其實自己嘅得着仲多。本周第二幕深刻，係奧巴馬連任後公開感謝太太一幕，一國之首企在世界之巔時，唔係掛住逞威風，而係搵位做下把，情況如同馬英九聲稱太太係佢嘅最大反對黨一樣，以退為進，海闊天空。至於香港政界一班賴老婆嘅「BMW黨」，唔好怪佢哋幼稚，佢哋好快就會好似尹佩斯咁長大，只要嗱嗱聲換咗份工，同埋個老細。keymannow TV主持mailto:[email protected]