50歲的杜德偉（Alex）今日終於做老襯，在深灣遊艇會擺懷舊喜宴，迎娶26歲攝影師女友Ice Lee，星級兄弟團梁朝偉、呂方和鍾鎮濤等撐場，準新郎杜德偉希望全程保持清醒，除了自謙酒量淺外，他主要不想醉爆，錯過婚宴美好片段。
杜德偉選擇今日光棍節成親，脫離單身行列，與26歲嫩妻Ice Lee拉埋天窗，他們早上會有傳統接新娘儀式，中午註冊，晚上在深灣遊艇會設宴，喜宴大玩50年代懷舊風。據知一對新人會換三套禮服，當中有懷舊造型。酒量甚淺的Alex日前表示只淺嘗美酒，因為他擔心自己會「斷片」，同時也奉勸賓客不要醉爆失儀。
張揚唔隊酒
圈中好人緣的Alex更邀得梁朝偉、呂方和鍾鎮濤等做星級兄弟團，他日前說：「婚禮時，11對兄弟配姊妹會引領我哋進場，兄弟團日前開咗會，大家都有唔同崗位，我仲有個醫生朋友，佢話帶定急救箱，怕我哋太緊張，以防萬一幫大家急救。」
倒數做老襯的心情是否很緊張，Alex淡定說：「唔係緊張，係期待。」由於婚禮玩懷舊風，會場以黑白紅三色佈置，他說：「我又冇限嘉賓有dress code，但佢哋着得唔切合主題會好後悔。」Alex可擔心被老友隊酒，他先旨聲明：「我唔希望囉，我想個婚禮可以留低浪漫溫馨記憶，千祈唔好『斷片』，我都唔想有人嘔同暈低。」一對新人將於21日移師台北再擺酒。
齊刨育兒書
問Alex婚後會做大男人，還是小男人？他認真說：「我家經營時裝公司，返工時要做決策，梗係要大男人啲，但返到屋企梗係想被動啲，所有嘢交畀老婆話事。」Alex和Ice計劃婚後先過兩年二人世界才造人：「咁樣先至無憾，婚後同老婆做好準備先迎接新成員，對子女將來更負責任，婚後會一齊讀吓點樣培育子女嘅書，然後先『砌』人仔出嚟。」
Alex昨日在微博放上白色禮服相，寫着﹕「還有一天，我的人生就圓滿了！」鍾鎮濤在微博透露正趕返香港，並說﹕「為明天（今天）脫離光棍行列的杜德偉做伴郎，祝老弟永結同心，幸福快樂，添丁發財！」
採訪：比華利