收到香港大學新聞稿，講11月27日港大舉行第187屆學位頒授典禮，有三位名人獲頒名譽博士學位，就係名譽法學博士包致金、名譽社會科學博士鄭家純、姚明。
呢三位真係大名人，左丁山一睇個名就知道係邊位。包致金大法官最近因有傳言「被退休」，離開終審法院，常常見報，唔識佢之人，最近都有認識啦。鄭家純在本港商界無人不識。姚明更係全世界NBA粉絲都識，姚明以前嚟過香港未，左丁山真係唔記得，以佢身高七呎七吋身軀，如果搭本港地鐵，要有專人招呼先至得，佢有時間在港大體育館係咁意射籃三四次，教吓港大籃球隊都好吖，必定吸引全港記者。呢個學位頒授禮由校監梁振英博士主禮，在機場亞洲國際博覽館一號展館舉行，夠晒大陣仗。
好奇之下，打聽吓中文大學今年頒授榮譽博士學位俾甚麼人，一查就知，中大於十二月六日在中大邵逸夫堂舉行第72屆頒授學位典禮，由校董會主席鄭海泉博士主禮（梁振英博士係校監，到時唔得閒到中大），三位獲頒榮譽博士嘅名人係榮譽法學博士Richard Charles Levin，榮譽文學博士榮鴻曾，榮譽社會科學博士Father Alfred J. Deignan, SJ；哎，三個人在香港名氣遠遠不及包致金、鄭家純、姚明噃，究竟係乜人？左丁山知道Levin係耶魯大學校長，約十年前佢來港籌款，左丁山聽過佢演講。榮鴻曾呢？有少許印象。至於Father Deignan，究竟係邊位？中大校友賓架T係九龍華仁畢業生，佢對左丁山講：「佢中文名叫做狄恒神父，03年已經得到港大名譽博士學位嘅嘞，以前係九龍華仁校長，九二年已經退休，做過港大利瑪竇宿舍舍監，好出名㗎！」原來如此，狄恒神父在港數十年，對本港教育係好有貢獻嘅。榮鴻曾係匹茨堡大學音樂系教授，2010年來港擔任新亞書院學術文化講座主講人，屬音樂學術界大師。至於耶魯校長Levin，左丁山印象最深嘅係佢在港講過：耶魯大學電腦系學生讀完四年畢業，就發覺佢地所學知識全部落後晒，在職業上無大用，唯一可以一生受用嘅就係在耶魯學懂獨立思維，批判性思考！大學教育唔係職業教育呀！