港女話：「給500人情就不要來了！」不過當年劉以達娶妻設宴，賓客肯定唔使俾五嚿水人情。
話說喺98年12月2日，當年35歲嘅達哥告別寡佬生涯，迎娶26歲嬌妻冼美珍。佢哋喺紅棉路註完冊，同埋親友拉大隊坐旅遊巴入深井，你咪當達哥儍喎，因為佢真係請你食燒鵝！喺深井陳記筵開五席，有幸見證呢餐燒鵝宴嘅圈中人，原來只係得曾志偉同俞琤，就連達明一派嘅拍檔黃耀明都冇份！咁呢圍經濟夾實惠嘅燒鵝宴，有啲乜嘢食？深井燒鵝一隻、粟米肉碎羹一鍋同豆醬炒時蔬等等，每圍盛惠$840，五圍埋單都唔使五千蚊，達哥開善堂請晒班親友食又點話吖！
明年賀水晶婚
達哥日前接受我哋訪問，講番呢件事，佢就話：「當年大家以為我窮娶妻，其實嗰日註完冊諗住同親戚食餐飯，都唔算係正式擺酒，大家一直都誤會咗。因為我住新界，好自然就同屋企人去深井食燒鵝，明年係我同老婆結婚15周年（水晶婚），我哋諗住到時先搞派對一次過慶祝，地點都未決定，但唔會預大家俾人情。」
撰文：阿Wow