行會新貴林奮強被揭偷步賣樓，為避風頭申請「休假」，下場如何，暫時係未知之數，公民黨梁家傑噚日喺立法會內務委員會上提出動議，要求喺今個月21號嘅大會上，就林奮強事件進行休會辯論，要政府就有冇外洩機密資料、行會成員操守有個交代，梁家傑質疑林奮強嘅休假不恰當，有關安排係前所未見，令林可苟延殘喘政治生命。
連自己點錯都唔知
噚日會議廳內有30個泛民議員，29個保皇黨，當中梁君彥係內會主席，慣例唔投票，即係只有28票保皇，如此形勢，應該可以通過提出辯論，可惜表決卻有戲劇性結果，雙方陣營29票打平手！究竟發生乜事？
原來白鴿黨新丁議員黃碧雲竟然唔小心投錯棄權票！結果贊成同反對票數均等，見到呢個結果，全場人盡皆愕然，最後由梁君彥出手，投下決定性反對票，議案被否決，白白放生咗林奮強。
會後黃碧雲就投錯票道歉，話唔知道係系統出錯，抑或佢自己㩒錯掣，錯咗都唔知點錯，真係一嚿雲咁，同民建聯Tree根之前被諷刺唔清楚開會規矩似「一嚿雲」有得揮。點知到咗噚晚，謎底終於揭開。財委會表決中止討論長者生活津貼時，公民黨陳家洛明明投咗贊成，結果又被電腦篡改為棄權，民主黨劉慧卿即刻食住道勢幫黃碧雲兜番，令黃碧雲唔使變「黃失魂」。
mailto:[email protected]