大堆無謂國際賽安排喺下周三，球星們唔使一周雙賽打真軍，料今輪英超入球「大」極惡，不妨多選幾關合心水場次減輕注碼壓力；重心先取中下游嘅雷丁及史篤城，輕裝上陣，或能在今輪享受久未或從未試過嘅勝利。
呢個世界，識講嘢冧「老細」點都着數啲，強如美國總統奧巴馬，用「最好的還未到」（the best is yet to come），冧盡佢嘅「老細」（選民）；按例玩多4年走人。不過英超係金礦也好，銷金窩也好，球季已開了近3個月，未符期望球隊，追分壓力漸大，尤其是季初重金「昆」老細科水擴軍球隊話事人。羅渣士話紅軍要兩至三年先執得掂（球會3年內已3換領隊）；上仗入金球嘅阿蘇，少帥大讚呢位射手似美斯；要老細落叠，總要有賣點，紅軍長期成績欠奉仍常被捧熱，因大量擁躉不捨其驚人魅力，但近年不斷證明絕非賭友甜心，「最好的紅軍，幾時到？」
昆軍嘅領隊曉士上仗主場鬥雷丁，焗用安頓費迪南打正選後防混亂，終苦戰和波；呢班波正宗大花筒，球會老細公開話撐，但高薪兵各自為戰，睇嚟曉士下年1月轉會窗仲話到事算佢叻。暫時睇唔到班波「最好」係點樣，今周作客今季初頗頹嘅史篤城，後者反值得推介。
史篤城班底屬中游，領隊普利斯帶隊升班多年，穩打穩紮；今季開季以來只嘗一勝，前線仍以長人中鋒高治最具威脅，配合死球攻勢更甚，防守極穩少見大敗，今晚招呼四不像嘅昆士柏流浪，傳統英式踢法對付安頓費迪南及賴恩尼爾遜呢對騎呢客軍中路守將，可逞強。今晚英超同時段11點有6場波，波友多唔會睇呢類波，不過好睇同好賭係兩回事，如熱捧阿仙奴，小弟早怕怕。
另一場，冇乜人睇，但有投注價值嘅係今季仍未開齋嘅雷丁，迎戰近績硬淨嘅諾域治，入球「大」可期；領隊被炒壓力，雷丁麥達莫未有耐，因小本經營，班主期望非大，多次強調班波主場一向少輸極惡，諾域治心雄反會中正下懷，今場個人會攻大比數主勝波膽。
好睇又好賭，可博明晚曼城鬥熱刺，文帥鬥波帥，近期俱轉沉需要聯賽勝仗冲喜；曼城返主場踢聯賽幾時都可以講惡，熱刺中路防線早前對車仔用35歲加拿斯見大缺口，放開懷抱對攻，或有驚喜，但個人會估曼城大勝。
（下次見報日期：17/11）
文：蘋果波神