開心真係有樣睇，明日結婚的準新郎杜德偉，日前接受訪問時蓮子蓉口面，事業愛情兩得意，準新娘Ice Lee是他時裝事業好幫手。50歲才成家立室，杜德偉認為不遲也不早，時間啱啱好，成功「得米」把美人私有化，難怪他風騷地說：「我真係好愛佢，我唔娶佢就係笨蛋。」撰文：比華利
五十而知天命，杜德偉思想傳統，他堅持人生每個階段要按部就班，有事業的他已完成儒家起步點修身，近年與26歲攝影師女友Ice Lee的感情穩定，杜德偉更認定非卿不娶，所以他明天便進入齊家第二階段，在港迎娶Ice入門，組織二人世界。人逢喜事精神爽的杜德偉日前在新蒲崗工作室接受本報專訪，每談到未婚妻便嘴角含春。雖然未簽婚書，右手無名指已急不及待戴上婚戒。
成熟負責任
「待娶」的杜德偉全程笑不攏嘴，他說：「今年決定結婚，真係好啱timing，人生冇可能完美，我呢刻唔可以話最幸福，只係覺得自己呢個階段夠成熟去負起家庭責任，可以牙齒當金使。」
有報道指杜德偉有感幾年間父母先後離世，才萌起娶妻之念，以照顧自己起居飲食，他澄清一切大錯特錯，還即興對Ice發表愛的宣言：「全部係誤會，我真係好愛佢，我唔娶佢就係笨蛋。」他記得決定結婚前，曾跟一名世伯商量，他說：「呢位uncle會做我嘅證婚人，佢知道我要結婚，佢都問過我係咪諗好，我答佢同樣答案，uncle感受到我呢刻好踏實，好適合建立一個家庭。」
杜德偉和Ice年齡相差成半，兩人間絲毫沒代溝，相反夾到不得了，他說：「我自問比實際年齡幼稚，但Ice份人剛好比實際年齡成熟，我哋係凹凸配。相處時，大家有個心係令對方開心。」杜德偉還形容Ice是他的「衣物柔順劑」，並非是娶老婆洗衫，他解釋：「我性格好急，有時都幾火爆，又易，但Ice對我好有耐性。」
妻子管財政
杜德偉有自知之明，明知自己炮仗頸，他與Ice約法三章，他說：「我哋都會嗌交，但嗌交一定會喺兩分鐘內熄火，我哋好有默契，唔會有隔夜仇。」杜德偉婚後主力向外銀，然後交Ice做財政大臣，他說：「為咗頭家，我要賺多啲，我嘅即係老婆嘅，佢打理家頭細務，將來有埋細路，錢仲要使多啲，老婆管錢，我樂得清靜。佢知我賺錢幾咁辛苦，就會更加愛錫我。」杜德偉得米娶得嬌妻，發表愛妻論都風騷過人。
與外父同年
Ice的父母愛屋及烏，視杜德偉如兒子痛錫，但近日他被爆跟岳父同年，杜德偉不但沒尷尬，還形容大家關係微妙，自認是非常女婿的他說：「可能我做呢行，公眾人物同一般人有啲唔同，平日有經理人貼身照顧，所以岳父岳母都覺得我幾小朋友。Ice係家中長女，佢要肩負照顧細佬細妹，我會幫吓手，於是兩位長輩又覺得我可以幫手分擔啲嘢。」