有人話「搵錢」才是香港多年核心價值。或許風花雪月太久（更可能係無力再衝），發現那無止境的追逐，根本超出人類腦細胞負荷。以有涯隨無涯，殆矣。谷得耐都有「謝皮」一日，或者「一蓑煙雨任平生」的生活態度，命更長久。
記者：陳慧敏
攝影：楊錦文、劉永發、陳盛臣
好在……輸剩塊田
「係咪好舒服呢？」
踩單車的Eddie領着我們在綠油油的田園間游走。人在粉嶺，想像六十年前的十一月，放眼是一片金黃稻田。Eddie：「粉嶺當年係個種米自給自足嘅地方，廿年後大陸米輸入令香港米降價，大家唔怕冇米食就轉而種菜。四個半到五個月一茬稻米，變成四十日一批菜心，種多好多轉喎！廿年後大陸菜又衝擊香港，呢度就變成荒地喇。」躲到田野來，霸權壓迫仍在。
Eddie的前半生，是一齣大婆台的台慶巨獻：高峯期在國內有五間工廠，二千多個工人，鮑參翅肚唔貴唔肥唔食。金融海嘯，人事鬥爭，客人走數，個零月間十幾年努力化為烏有，Eddie的權力之手由頭頂的高度，篷一聲掉到最低：「咩都冇喇。」輸剩風光時租落、附庸風雅減壓用的田，發了三日吽哣，惟有起身耕田，經營有機農莊：「好在有呢塊田，唔係人都癲。喺度反而係個冷靜期，雖然負債，但種到啲嘢出嚟，有番薯又有菜食，唔使出街已經解決咗食嘅問題，餓唔死嘅。」
一盤生意一殼眼淚
不是棄塵俗歸園田居就一天光晒。
Eddie四年來投資百多萬，萬呎田園擴充到廿幾萬呎，但未回本，「因為開心，所以判斷錯誤。喂，一斤有機菜賣三四十蚊喎，一畝地千斤米、幾千斤番薯，番薯成十蚊十五蚊斤都夠厲害啦，四至五個月收幾十萬喎，幾大都開荒投資啦，嗱嗱聲！」生意人的計算，在大自然之下就捉蟲。今年七月快收成時，十三年來至勁的十號風球韋森特來襲，成棚義工冒雨來幫忙收割，損失約兩成稻米收成，其他農作物更大鑊：「種落一千個西瓜，有六七百個，瓜晒！仲要係差兩星期就可以拎出市場賣。粟米田亦全部掃平晒。雖然已經幫啲植物拉晒繩，但連大型的石榴樹、荔枝樹都冧晒。個個（工人）睇到呆晒。」點算？「冇㗎，咁咪借個殼嚟載淚水，一殼眼淚！」
憶起舊日風光咪更喊得一句句？Eddie：「我唔懷念之前。以前三十五吋腰圍，而家三十一吋。以前每日食藥六粒，血脂膽固醇尿酸高。家body check全部正常。腦筋清靜，嗰啲爾虞我詐唔需要，淨係要學習。」得閒報讀漁護署課程，傷風感冒連成藥都唔使食，幾凍都冲凍水凉：「邊個三年內可以一次醫生都未睇過？醫生嚟我農莊食嘢就有。我淨係去洗牙同捐血㗎咋。所謂無奸不成商，我當日就係唔夠奸，唔係我仲經緊商，仲食緊藥。」
彩虹有機農莊
地址：粉嶺鶴藪DD76地段東山下村（香薰園後面）
網頁：www.strawberry-farm.com.hk
電話：9302 0258
退休 搬入鹽田梓窮風流
回看訪問49歲退休廚師豐哥的片段，腦裏不停響起黃耀明的《窮風流》。退休後搬入鹽田梓村，現為島上唯一長駐居民，兩公婆三隻狗三隻鸚鵡兩隻貓同住。每日八點左右起身食早餐，種田打魚，飲吓啤酒，幫村民修這修那，就過一日。他的動作節奏像他那酷酷的虎紋貓，慵懶，但隱隱又透點風骨。坐在小前院傾偈，不時有旅客伸頭進圍欄：「有狗呀！有鸚鵡呀！」他都好少理，Hea坐煲煙。我們想影田，他推開竹門就走，唔使鎖門？「唔鎖！」成條村佢嘅一樣，堅瀟灑。
年輕時在大陸開公司做運輸，豐哥：「我又煙又酒又粗口，返大陸做生意有咩衰嘢你都知㗎啦！」唔知喎，例如？「講咩啫！唔講衰嘢！」丟給我無限遐想。跟住又在西貢開了三年西餐廳，幾好賺。但越做越無心機，結業後打散工，救生員、揸車揸船，又用五、六萬蚊買了架遊艇仔做私房菜，投資十多萬，租給人遊船河，「家賣晒喇，放晒喺度（裝修新屋）。買返隻快艇出入用，不過出入一次要百幾蚊油費，都係盡量搭返街渡。」
機緣 像種子遇啱土釀
離開城市，搬入一日最多得四班街渡、早幾年才復修的鹽田梓，爛屋都租，是有伏線的，「唔係有咩精神病或有咩大創傷，亦唔係你講嘅想隱居。其實我同老婆心裏面一直都有（搬到安靜郊區去住）呢個諗法，但因為做嘢丟埋一邊。到得閒時，就好似一粒種子，啱氣候啱土釀濕度就會發芽。」想要田野景色，元朗粉嶺大把，但想要埋豐哥最愛的海，就要返入西貢。年多前跟姐姐到鹽田梓村做義工，同想復興老村的村長陳子良傾偈時發現這裏，就租。 「不能說」的租金係「一聽就興奮」的便宜，但其實除了有個完整的屋頂外，連四面牆都有點危危乎。豐哥：「初頭呢度係爛屋嚟，二樓間層啲木只爛剩少少。租就好平，裝修就好甘。自己做，淨係買料都用咗廿幾萬，一租十年。」兩年前我都嚟過鹽田梓村，樹林密佈，滿村都係好啱拍鬼片的爛村屋。要下這個一租十年、仲要揼本大修的決定，這樣的眼光，不凡。
