鏞記辦完白事，家族官司了結，不過連串慶祝70周年活動取消，原本打算邀請城中權貴嘅豪門宴都縮減規模。據了解，二弟甘琨禮趁今日70周年正日，以私人派對形式喺鏞記筵開10圍8圍，宴請好友聯誼。亦有指設宴嘅係甘琨禮女兒甘蕎因，佢係國際企業家協會成員，協會一連三日嚟香港搞論壇，順便遊覽香港，會員共88人今晚喺鏞記晚宴。
至於70周年紀念活動，就喺今日下晝3點揭幕，喺鏞記地下搭個大排檔，重現創辦人甘穗煇當年經營嘅排檔鏞記，甘蕎因會親自介紹鏞記歷史。八方問甘健成兒子甘崇軒，對二叔搞派對有咩睇法，佢指活動屬私人性質，不作評論喎。