教育局政助施俊輝（Jeff）禮拜一返工，八方噚日見到佢，勾起一段難忘回憶。Jeff係03年九龍華仁會考10A狀元，同年嘅狀元總共有17位，但只有佢係無名氏。當年好多記者去到九華門口，校工話唔知有狀元；之後校方改口話Jeff已經走咗，最神秘係連姓名都唔肯講，令Jeff變成會考史上唯一狀元空洞。Jeff解釋話當年校方想低調，「唔係我玩你」。
九華同港華校友組成嘅華仁一家基金，會喺下月22日舉行籌款音樂會，以「超友情價」邀請「譚校長」譚詠麟，同明年退休嘅港華譚兆炳校長一齊獻唱，同場仲有失意官場嘅前特首辦主任梁卓偉、劈炮唔撈嘅衞生防護中心總監曾浩輝表演彈琴，門票現正發售，不過只限與華仁相關人士購買。