【本報訊】一籃子為不同屋苑購買一份共同保單，對業主來說有好有壞。國際專業保險諮詢協會會長羅少雄表示，不少大型管理公司，為負責管理的不同屋苑購買一份保單，可獲取較便宜保費，「如果份保單咁大，保費上梗有折扣，claim錢（索償）嗰陣亦都會較易批款」。不過，不同屋苑分擔保費「拉上補下」，個別屋苑會支付較多保費，「例如A屋苑又舊、事故又多，保費自然貴；樓齡較新、事故較少嘅B屋苑，保費相對平啲，但係兩個屋苑買同一份保單，保費係拉平均咗，但B屋苑就會畀多咗」。羅又稱，一籃子保單的條款屬「大包圍」，但每個屋苑的地理環境及設施不同，個別屋苑或會出現多餘條款，變相白付保費。
換管理公司要取回所有圖則
香港保險業總工會理事長張偉良表示，買保險漏報屋苑設施，後果可大可小，「試過有工人維修大廈外牆時跌死，點知大廈原來冇買保險，最後要業主夾錢賠2,000萬」。張偉良又提醒準備撤換管理公司的法團，要向管理公司取回屋苑所有圖則，「例如泵房、電梯、地下水管煤氣管等圖則，如果對方事後唔攞番出嚟，發生事故做維修會好麻煩」。