三級片《紮職》戲中涉及多場幫會儀式，演黑社會遺孀的溫碧霞為夫報仇，兩個二十多歲後生仔陳偉霆、吳浩康爭坐龍頭位。雖然被江湖前輩陳惠敏取笑有欠說服力，又正如肅殺的黑社會儀式，有幾何見過溫碧霞這類艷女穿上內衣露面。話時話性感歸性感，拍完這場戲，她自言都被當中斬雞頭燒黃紙的場面，嚇得發噩夢。撰文：張俊銘、文國駿
香港上映日期：11月15日
由溫碧霞（Irene）和陳偉霆（William）主演的江湖片《紮職》被評為三級，戲中演黑幫大佬林利老婆的Irene表示，香港近年少有類似的江湖電影，加上今次扮演心腸狠毒的江湖大家姐，令自己在演繹上有更深的體會：「今次嘅角色係好有智慧、敢作敢為嘅黑社會遺孀，好多事都放喺內心，唔係表面惡出嚟，要演得好內斂。」
《紮》片被列為三級的其中一個原因，主要是戲中一場黑社會入會儀式，Irene表示過往看過很多古惑仔電影，很多都是點到即止，今次導演花了很多筆墨去表達，感覺就如恐怖片般詭異，她說：「儀式要許願、拜神，放一張刀喺你背脊誓願，劏雞殺鴨，我未接觸過，拍完之後仲好深印象，當晚仲發噩夢。」原因是過程太真實令人毛骨悚然，不過亦不乏香艷場面，就是Irene要穿着性感內衣起誓，相信是為滿足部份觀眾的視覺享受。
打不留手鬥狠
另一場令Irene難忘的戲份講她怒摑手下吳浩康，有別於過往被人欺負的感覺，原來同樣並不好受：「我同佢反面，狠狠打佢一巴，以前都係我俾人蝦多，今次到我出手打人，感覺都係好難受，原來蝦人都唔係咁好過。場戲都好火爆，第一次打時我有留手，到之後放盡去打，好在拍兩次就OK。」
另一邊廂的William入影圈四年，擔任過主角的電影《前度》、《出軌的女人》都從女性角度出發，今次反其道而行改拍陽氣十足的《紮》片，他坦言不太習慣，但卻很喜歡嘗試：「我覺得自己大個咗，都唔想成日只係拍愛情片，可以嘗試拍男人味重啲嘅戲，今次終於有呢個機會好開心！」
William捱打三日
戲中William飾演的角色在十年間由街邊古惑仔搖身成為社團大佬，箇中為上位就要嘗被連打三日之苦：「真係唔好以為我好風光，我開工第一日就俾人打腫塊面成吋厚，結果有啲鏡頭都要就住唔好拍右邊面；之後第二日又係俾人喺棺材舖狂打；第三日就係廟街，之後我終於忍唔住問導演仲要打幾多日，似紮棍多過紮職。」
講到戲內與譚耀文及陳惠敏等前輩合作，William坦言自己獲益良多：「惠敏哥唔使講啦，行出嚟已經有氣勢，佢係片場都有用自己嘅經驗教我哋講啲社團術語。」至於譚耀文，William笑言其母視阿譚為偶像，更試過到場探班：「我同阿媽好鍾意睇阿譚做戲，我同佢喺片場都幾多嘢傾，佢又鍾意跳舞，交流吓㗎。」
化妝：Middi Yan
髮型：Daniel of Chin.G
場地：華星冰室
故事大綱：爭做龍頭大廝殺
《紮職》講述阿霆（陳偉霆飾）、阿祥（曾國祥飾）及阿棟（徐偉棟飾）屬同輩兄弟，16歲開始在油麻地跟隨耀文（譚耀文飾），情如手足。阿霆由舊同學搭路靠幫富豪收數聲名漸響，得罪了同字頭的火爆明（林利飾）被毒打。阿霆與千金小姐Michelle（詩雅飾）相戀。Michelle父親王老闆（盧海鵬飾）跟女兒打賭，阿霆不會為愛情放棄黑社會。社團下令要除去火爆明，負責出手的阿霆因新仇舊恨，沒有理會大佬希望私下放火爆明一條生路的要求，令他成功上位有機坐上龍頭位置。不過火爆明遺孀Irene姐（溫碧霞飾）為夫幫仇，既要爭做龍頭更要阿霆血債血償。
