奧巴馬順利當選美國總統，得以連任，乃意料中事，並無驚險，美國嘅民意調查詳盡到極，又夠專門，地區性、地方性、有全州、有全國，分族裔、分收入階層、分皮膚顏色、分性別，分類多到眼花撩亂，兼且美國人慣咗接受調查，唔會講大話，做投票後票站調查十分容易，故此官方點票未完，各大電視台已爭相預測邊位候選人會勝出，準繩度極高，呢方面香港仍然有人攻擊民意調查不科學，亂咁噏，實在係好落後。
既然咁多調查，事前已可肯定奧巴馬會在大州佔盡優勢，拿選舉人票270票（總數538張）並無困難，羅姆尼冇錯係在全國總票數方面只輸兩個百分點，輸得好近，但在選舉人票方面輸足二十個百分點，看似大敗一仗。冇法子啦，選舉人票以州人口為基準，東西兩岸嘅大州素來係自由派（liberals）集中地，單係加州已有55張票，共和黨支持者分散在中西部州份，羅姆尼贏幾個州都攞唔足55張票，有乜好講。
一位著名政治分析師、前克林頓總統之選舉策略顧問、暢銷書作者Dick Morris呢次就老貓燒鬚咯，投票前一日（十一月五日）佢仲不斷在霍士電視堅持羅姆尼會大勝8個百分點，連一向擁羅反奧嘅霍士電視節目主持人都問佢：「真唔真？」摩利士話：「我做呢行四十年，靠調查分析食飯，唔會錯嘅！」死咯，呢次佢唔知點樣解釋先至好，一個人無論有幾豐富嘅知識與經驗，一旦將主觀意願（反奧捧羅）與客觀數據混埋一堆，不識抽離嘅話，好容易做出錯誤解讀，害了自己名譽嘅分析，Dick Morris呢次大錯失足為政治分析師、民意調查人員借鑒。
美國總統、國會大選，估計用咗四百幾億港元做競選經費，肥了搖擺州份嘅電視台（因有不少政治廣告）及顧問人員，但對政治局面毫無改變，未來四年，奧巴馬仍然住在白宮，民主黨仍然掌握參議院，共和黨仍然控制眾議院，與過往四年一模一樣，伯南克份工好穩陣，可以繼續印銀紙，即係話我地香港可以繼續享受低息，繼續炒股炒樓，但要顧忌梁特首打個電話就會有「一車車打壓政策」隨時出籠！