本地漫畫家榮念曾設計嘅漫畫人物「天天」畫到街知巷聞，周圍都見到呢個右手手指指向天嘅細路。早排佢搵咗班本地設計師同名人幫「天天」設計新look，財爺都畀面畫番隻。
雖然展覽嘅figure有百幾隻咁多，不過一眼就望到財爺傑作喇，點解？事關夠晒「愛港」囉！隻figure件衫大大隻繡住「Hong Kong．香港」（圖），頸上面仲掛住條飄逸嘅披肩，唔通想祝願香港起飛？
離開立法會之後越嚟越省鏡嘅陳淑莊都有份畫，佢嘅傑作寫滿數字，非常cyber。Tanya同八方講，每個人生命中都有好多數字，佢就一路都記住自己六次參選嘅參選號碼嘞。佢仲話要多謝市民支持，一齊「天天向上」喎。