噚日八方話煲呔舊部、人稱「小Donald」嘅現任北區民政專員陳羿「升呢」，重返添馬艦做勞工及福利局副秘書長，但係就搞錯咗佢升D4位，實情佢只係由D2升D3。有政界中人笑八方，係咪因為勞福局副秘書長個位「惡啃」，所以以為「小Donald」做D4位？有泛民立會議員仲話祝「小Donald」好運，事關當年勞福局局長張建宗同工聯會老友鬼鬼，但今時今日連陳婉嫻都話張建宗變咗，工聯會再唔係政府嘅「朋友」，加上泛民嘅「人民公社」有成十幾票，日後「小Donald」淨係搞掂呢班左翼議員都有排「頭痕」。