聽日如果你見到幾百人喺灣仔，揸住酒杯通街食嘢飲酒，你千祈咪覺得奇怪，因為灣仔正舉行《嚐酒尋藝之旅》，參加者可以拎住私伙酒杯，嚐盡半個灣仔、20間名店提供嘅美酒小食。飲飲食食逛逛玩玩，估唔到呢份悠閒，喺香港相當難尋！
記者：朱崇德 攝影：蔡家輝
模特兒：Anladia、Lincoln@GME
Station 1：VIEW 62嘆分子小食
「出奇歡樂皇東節2012」今年已經係第三屆，如果你係灣仔人，應該知係每年一度大事，有小丑樂隊街頭表演、嘉年華會小遊戲、免費試飲試食、環保鬼馬服裝巡遊……熱鬧感覺好似過年一樣。
不過如果想搵食嘅，裏面仲有個《嚐酒尋藝之旅》活動，一次過網羅皇后大道東20間特色食肆、名店、畫廊同歷史建築，入面準備好晒美酒同小食招待你，這種飲食感覺，真係從未試過！「其實喺外國好流行類似活動，例如喺法國波爾多嘅葡萄酒馬拉松，大家會拎住酒杯，去唔同酒堡試唔同嘅美酒！」香港專業品酒師協會主席周國明說。今次精選的20間特色食肆、名店、畫廊等，基本上都預備了葡萄酒及小食款待參加者，而且當中更有唔少名店，如Chez Patrick Restaurant、The Habitat Lounge、22 SHIPS，甚至香港最具特色的合和大廈旋轉餐廳──VIEW 62 by Paco Roncero，要知平時喺呢度吃一道菜、喝一杯酒，都已經隨時Over咗大家所畀嘅$199門票價錢！至於活動嘅起點，就正是呢間聞名嘅米芝蓮二星級大廚Paco Roncero嘅分子料理食店！
360°維港香港島景色，可以話絕對獨家，更重要係呢度仲可以食到香港較罕見嘅分子料理。小記係呢方面嘅初哥，如要簡單理解，就係將食物改變咗形態與口感，並將最純粹嘅味道，呈現食家嘅味覺之上；為咗今次活動，暫知VIEW 62預備咗五道菜式及餐酒，供老饕們選擇。不過由於每道菜都供應量有限，所以會以先到先得形式供應。
Station 2：入MINI 搵食
喺今次活動裏面，就係要大家走訪一啲大家平時少去嘅地方，好似MINI嘅Showroom就係唔買車都唔會去嘅地方。店內預備咗葡萄酒同佐酒小食，呢度放住嘅係純法式風味食品，好似法國火腿芝士卷，火腿入口有點西班牙火腿嘅香濃口感，原條芝士條味道亦香濃；不過更美味嘅係以法式香料醃製嘅煙三文魚，配上法國甜麪包做底，味道芳香，口感濃烈，據周國明先生表示，最啱配襯係法國Chardonnay 2010，由於佢礦物味比較豐富，又有充足酸度，所以配襯濃味食物就最啱。
Station 3：Chez Patrick飲圓潤白酒
講到今次活動，周先生特別推介Chez Patrick Restaurant，唔為其他，係因為喺呢度你會搵到好獨特嘅酒飲，例如Saint Aubin 2010-Burgundy，佢係一支非常有品質嘅白葡萄酒，品味圓潤飽滿，但酸度仍然好靈活；Chateauneuf du Pape-2007更係一支幾名貴嘅紅酒，係嚟自法國一個非常特別嘅酒區，出名處係喜歡將六至十三種唔同嘅葡萄混合埋一齊，呢支酒聞落嘅複合味道非常豐富兼多元化，甚至聞得出藍莓、車厘子、黑漿果、丁香、肉桂等味道。嚐一口，感覺飽滿又馥郁，用來配襯法式小食會非常好！
「嚐酒尋藝之旅」（3583 5678）
日期及時間：11月10日3pm-6pm
票價： $199（10人以上可享有八折）
購票地點：灣仔合和中心三樓Dymocks書店
網上訂票： http://www.timeout.com.hk/discoverywalkonqre