「股壇長毛」David Webb經已進化成「股壇福爾摩斯」，佢最近搞咗個新系統，大家用經紀名或投資者名稱（如果係自己揸）就查到佢哋嘅股份持倉，政商界名人、馬會前主席陳祖澤，竟然用自己名揸住11隻股票，市值超過3500萬，認真高透明度。
個人持股三千幾萬銀
陳祖澤名下揸住545萬股粵海投資（270），市值3368萬，最值錢，粵海投資即係賣東江水畀香港嗰間公司，估計批股票係佢98年開始做粵投獨立非執董，03年開始收option，行使之後換來，option行使價平均1蚊多啲，粵投昨收6.08元，賬面盈利甚和味。除咗粵投同載通（062），陳祖澤另外揸住嘅9隻股票，佢都唔係董事，應該純粹投資。以前啲人成日話「有買貴、冇買錯」嘅滙控（005），佢都有2萬股左右，市值156萬。