【本報訊】想一窺龍顏變色，不需50萬人上街，幾面龍獅旗、幾聲「我要自治」，已足以令過氣京官，甚至國家領導動真格；一口屎「沒有巿場、不得人心」，一口糖「共享做中國人的尊嚴和榮耀」，包括三個疑似「港獨分子」在內的港人，個個啼笑皆非。被指「分裂國家」的三大嫌疑犯今天重申，最大心願是保障港人利益不再受剝奪，說他們「教人分妻」，太過抬舉。記者：張嘉雯
港獨頭號「嫌疑犯」、香港自治運動發起人陳雲嘴硬，是隨時被迫到「一拍兩散」的高危人物，聽到魯平的東江水供港論會說，「你試吓唔供應吖，唔供應咪暴動囉。」評梁振英的「不要閉關鎖港」，會大鬧「梁振英係黐線㗎。」但說到港獨，他認為香港與新加坡環境不同，有港獨想法的人是妄想，「建立一個國家唔係咁細件事，係好麻煩嘅，要有國家民族精神，呢樣嘢唔係咁易。」
獨立需要極大成本
陳雲認為，香港與中華民族的關係不能分割，難以獨立，「香港唔同新加坡，新加坡有三分一馬來西亞人口，同埋有一半人文化來自印度同英國，華人佔一半到之嘛，係複合民族嘅地方，香港八成九成係華人……。香港一旦要建立一個國家，搞呢個民族身份都好複雜。」他又表示，獨立需要極大成本，「有啲人可能會咁樣妄想，『獨立好喎，好似新加坡咁樣。』但建立一個國家唔係咁細件事，唔係純粹話軍事防衞，嗰啲可以靠美軍，建立一個國家，你要有國家嘅民族精神。」
提出城邦論的陳雲，再三強調他的論述只是捍衞憲法下一國兩制、高度自治的權利，「其實喺《基本法》下，香港嘅自治權比殖民地時代高，香港人根本慣咗冇自主權，唔追求獨立；只不過家又雙非、又買唔到樓，個個冇啖好食，好似奴隸咁，先用呢樣嘢保護自己嗰種生存方式。」
陳雲冷笑魯平的東江水論，「你試吓唔供應吖，唔供應咪暴動囉！暴動，金融巿場就混亂，佢（國企）唔可以喺度上巿，唔可以喺度發行人民幣債券，唔可以喺度做金融對冲，咁佢咪靠上海囉，靠上海我睇吓美國佬點整蠱佢。」
談到梁振英「閉關鎖港」的批評，他罵得更狠，「黐線㗎佢，梁振英係黐線㗎，一個城邦，一定係講國際關係，一定係開放㗎，點會閉關啫；問題係家（香港）淨係向中國開放，淨係向晒中國傾斜，啲利益畀佢攞晒吖嘛。」
中央反應之大，陳雲有心理準備，「佢哋一路食開你香港，家你班友突然間醒咗，自由行、雙非俾你打走咗，水貨佬俾你打走一截，想食埋你東北，又識咁醒目去抗議，以後利益唔可以食咁大啖，所以佢有啲唔舒服。」
