唐牛兒時最愛光顧嘅老牌地道快餐店，近月終不敵租魔，光榮結業，取而代之係牙科診所。無他，租金貴到無倫，人工負擔又重，小本生意根本難以承擔。足證從投資角度，如果派息吸引，收租股任何時候都值得吸納。好似唐牛愛股領匯（823），噚日再創新高，一度升穿40元。睇番中期業績，物業淨收入增長10.5%至22.6億銀，可分派收入亦增近13%，以中期息每股71.08仙計，年度化息率都仲有3.6厘，加上全年派息例牌有增長，現價計買嚟收息依然吸引，但股價有冇Upside，好視乎未來收購及翻新活動，能唔能夠谷高租金。吉利汽車（175）噚日公佈10月份銷量達4.86萬部，按年及按月增幅分別為35%及13%，首10月銷量佔全年目標81%，達標應該不成問題，上月出口量更創歷史新高，後市可看高一線。噚日港股大跌532點，吉利竟然逆市上升0.3%，硬淨到暈，喺好消息配合下，見4字頭應該冇問題。唐牛