公民黨毛姨姨噚日帶埋愛犬Dogma開記者會，講吓漁護署提高非法售賣狗隻嘅法例修訂，但主角卻「另有其狗」，就係佢老友Janice養嘅一隻半個人咁高、重200磅嘅黑色大丹狗Harley。
非法賣狗罰則提高
Harley兩腳着地足足有成7呎高，可能係全港最大嘅大丹狗，大隻唔代表惡晒，Harley噚日相當乖，吠都冇吠過，反而Dogma細細隻卻大大聲，有啲躁底。
Janice係Animal Speak創辦人，佢話Harley身世可憐，首先係有人亂咁繁殖，搞到佢比一般大丹狗重多50磅；未到1歲已經換咗幾個主人，仲被人困喺細籠虐待，最終由Janice領養，逃離厄運。毛姨姨話嚟緊嘅法例修訂，對非法售賣狗隻嘅罰則提高咗，但認為應該涵蓋埋貓仔，建議同時向曾經虐待動物嘅動物售賣商永久釘牌。呢個修訂諮詢本月底結束，愛動物之人快啲發聲嘞。