港人冧爆逾一億人投票選出嚟嘅美國總統奧巴馬，但一見到由689票選出嚟嘅狼振英就即刻down晒；如果唔係海難，狼振英上任以嚟嘅民望一直插水，但有「狼爸」外號嘅中聯辦副主任李剛，護子心切下竟然講大話讚乖仔狼英民望「不斷」上升。嘩，「兩仔爺」講大話咁出神入化，真係嘆為觀止。沉寂一時嘅李剛噚日喺北京十八大蒲頭。自從被各界批評佢喺南丫島海難後、喺狼英陪同下以太上皇姿態巡視醫院阻救援後，佢鮮有喺公開場合露面。
大讚民望「不斷」上升
噚日返回北京主場，有阿爺撐腰梗係大聲啲，當被問及中央係咪有plan B要換狼振英時，佢竟然話狼英上任以嚟就發展經濟、改善民生做咗大量工作，之後話否則狼英民望唔會「不斷」上升。八方最初都以為聽錯，但有現場扑咪行家話，李剛真係用「不斷」呢個字㗎。事實勝於雄辯，港大民調顯示，狼振英上任後，民望不斷下滑；最近只係因為海難而令民望由46分回升至49分啫，民望仲「肥佬」緊，咁都叫「不斷」上升？大話係咪太離譜？明眼人都見到，狼振英上場後，「上升」嘅其實係民怨。國教搞到幾十萬人次上街兼圍政總，龍尾變人造沙灘連管海馬都趕絕、有錢派嘅特惠生果金都搞到成鑊粥。護子心切係重要，但都要講清楚事實先得㗎；有其父，必有其子，查實狼振英嘅大話術，係咪承傳於狼爸李剛？mailto:[email protected]