年尾好多人結婚，除咗「晶剛世紀婚禮」，恒生銀行（011）前大班梁高美懿呢個禮拜都嫁女。梁高交遊廣闊，一對新人分開兩日擺酒，先唔會順得哥情失嫂意，去飲嘅朋友唔係賓架就係大孖沙，份「人情」應該係500……後面加一個或兩個零啦。梁高二女Angela同佢老公Ronald都喺金融界工作，一個做投行，一個做銀行。睇佢哋嘅結婚相，先知道梁高個女咁省鏡，話佢係明星都好有說服力，最似梗係梁高後生嗰陣，尤其係佢哋兩位嘅笑容，一樣甜到漏。Ronald娶得美人歸，難怪咁鬼興奮。
新外母飛滬啖大閘蟹
一對新人今個禮拜一喺四季酒店筵開三十幾席，聽講長和系主席李嘉誠、嘉華（173）主席呂志和、玩具大王蔡志明等名人富豪都有出席。禮拜三就喺馬會擺18圍，主要宴請恒生、滙豐等銀行界朋友。梁高噚日同華華分享首次嫁女嘅感受，佢話做咗外母心情相當興奮，過程入面好多嘢唔識，搞到好緊張，冇覺好瞓。不過呢啲都唔緊要，阿女搵到Mr Right，佢好開心，又大讚女婿好孝順。嫁女另一個得着，就係好多住喺外國嘅親戚返晒香港，佢哋一早計劃好，擺完酒，齊齊飛上海食大閘蟹喇。李華華mailto:[email protected]
