賓架W神神秘秘，話介紹一位文化界戲曲專家俾左丁山認識，等冇文化嘅左丁山學吓風雅之道。好嘞，準時赴約：賓架W介紹一位女士，就係一本月刊「戲曲品味」嘅總編輯廖妙薇，唉吔，一見到面就知大家年年在「馨香宴」碰頭，點使別人介紹噃。公關大姐大每講起阿Miu，就豎起大拇指，讚口不絕，讚人之外，仲大讚特讚阿Miu為了個人弘揚戲曲之理想，離開TVB與有線之後，獨力支撐「戲曲品味」月刊，為推廣中國戲曲（京，粵，崑，西洋歌劇）而努力，在困難環境下，點都要撐下去。左丁山對雜誌市場，略識之無，知道香港專科/行業雜誌市場好細，銷路頂多得幾千本，而廣告來源有限制，即使全港全部戲曲表演一齊在「戲曲品味」登廣告，都唔係好多啫，難以支持一本雜誌之營運。廖妙薇有大把事好做，而偏偏為一本戲曲月刊苦拼，為本港戲曲界盡一份努力，確係精神可嘉，值得尊敬。
阿妙送左丁山一本2012年十月號，賓架W叫左丁山睇第42-43頁，專文介紹中國歌劇大師龔冬健。左丁山的確係冇乜文化嘅，不知龔冬健是何許人也，睇完篇文章，方知佢係中國男低音歌唱家，旅居美國二十多年，回歸中國，在國內甚為吃香，點知道在歐美巡迴演唱多年後，發覺中國最適宜佢生活嘅城市，捨香港莫屬，於是選擇來港定居。咁又係嘅，在西方自由創作、演唱，習慣咗西方工作環境，已不能適應內地嗰一套，來港演唱，授徒，培養香港藝術人才（因香港具備無限的藝術空間和條件），更有意思。
賓架W好慷慨，買飛捧場，請一大班朋友在十一月十日到文化中心聽龔冬健演唱。呢個演唱會聽落幾巴閉，香港中樂團由閻惠昌指揮伴奏，演唱者有男低音龔冬健、女高音黃華裳、男拔萃高級混聲合唱團，唱出白居易《花非花》，岳飛《滿江紅》，蘇軾《大江東去》，王維《陽關三叠》，禮記．禮運《天下為公》，現代嘅《我住長江頭》，可以話係大師詠嘆中國歌樂，古韻配今風。香港中樂團係世界級中樂團，龔冬健係世界級男低音，在歐美唱過五十幾部歌劇，唱過所有威爾第歌劇嘅主角，中樂團與佢配合，應該令人耳目一新。賓架W問左丁山有冇時間去聽，一定有啦。