星期一，晉佳轉軚做保守派，呼籲各位最好縮減一半注碼，踏入本周中段大市轉入直路，港股真係出現較明顯嘅調整，總算執番身彩。呢浸中線升浪係咪已經完結？晉佳真係唔敢講，惟有繼續觀察。不過，睇遠啲去到出年，升浪就肯定有排都未完。睇番恒指月線圖，指數已經突破咗20個月移動平均線，過往恒指明顯突破呢個水平，之後都呈大漲小回格局，由於6月恒指跌到去18000起步，5個月升到22000，大約升咗兩成，講真累積漲幅絕對唔算強勁，所以估計調整都唔會太深，現階段最理想嘅策略，就係向股神學習──趁別人恐懼嘅時候貪婪（買入）。回顧9月至今，晉佳介紹過嘅股份，以安東油田（3337）最強勁，至於市面上升得最勁嘅股，仲有玖龍紙業（2689）、舜宇光學（2382）同個別本地資產股，其他已經唔係即時諗得出，喺低位幾乎完全冇升過嘅股份，數目絕對係股價升逾五成股份嘅倍數計，照咁睇，呢兩個月整體市況唔算好強勁，應該係長線升浪開頭嘅正常現象。
料歐元債放行 環球放水
大批股份仍然低殘，最主要原因係市場仲未確認環球經濟係咪回穩，受經濟周期波動影響，同時基本因素仍未有起色嘅企業，股價都仲未能夠受惠。不過，中長線睇都唔係壞事，因為低殘股眾多，賺錢機會唔會少，家可以揀定啲心水經濟周期股份，之前介紹過嘅儀征化纖（1033）同俄鋁（486），都仲喺留位徘徊，未來不愁冇機會。中長線方面，晉佳對港股後市絕無懷疑，相信2013年會繼續好景。出年德國大選之後，隨時換總理，市場隨時喺大選揭盅之前，已經炒定換總理兼拍板歐元債放行，歐國融資成本有條件大降，變相令融資環境更寬鬆，形成環球大放水嘅盛況。配合歐美放水，中國無奈增加人民幣供應兼畀人仔繼續升值，呢個環境的確會增加港股炒爆條件，所以出年恒指照計會更加好。晉佳本欄逢周一、三及五刊出