賭王何鴻燊三太陳婉珍一向形象溫婉，好似與世無爭咁，但原來都識得據理力爭，不過就唔係爭家產，而係同何君柱律師樓就律師費有爭拗，仲可能搞到上法庭。三太日前入稟高等法院（案件編號：HCMP2507/12），要求何君柱律師樓喺14日內交出訟費單，然後交畀訟費評定官去評定，日後律師樓或者需要披露文件用作對數。
同「分燊家」有關連？
事件涉及14張由何君柱律師樓發出嘅發票，發票日期由08年6月至舊年11月，大部份都喺舊年發出。發票收件人包括三太本人，同埋三間由海外註冊公司出任董事嘅有限公司。翻查資料，舊年1月，賭王入稟控告二、三房侵吞家產，發展為「分燊家」事件，何君柱律師樓喺同一個月向傳媒披露已經獲三太聘用，唔知兩者有冇關連？不過三太本身有好多投資，當中亦可能需要律師幫忙嘅。