無綫噚晚喺將軍澳電視廣播城搞節目巡禮,全台藝員當然傾巢而出同客戶見面,男藝員以華麗禮服現身,女藝員少不免要騷胸,當中以高海寧最性感。無綫明年嘅劇集,以黎耀祥同馬國明主演嘅最多,女仔就係陳茵媺同黃智雯最多劇。綜藝節目方面,肥媽會主持搵食節目,而之前《盛女愛作戰》雖然俾觀眾狂插,但無綫依然會再搞一個近似嘅真人騷。
許亦妮說夢話
噚日啲藝員為巡禮拜神,被傳同花弗金剛撻着同居嘅發電王許亦妮都有現身,許亦妮否認緋聞:「我哋係同事,唔知佢住喺紅磡嗰度,但我有朋友住,不過我唔係話金剛。」有冇發展機會?許亦妮話:「咁要問個記者,睇到報道我好似發夢咁唔知乜事。」講到金剛好花心,許亦妮話:「我唔知,同佢只係朋友,真係莫名其妙。」
有傳陳豪會同女友陳茵媺喺中環開咖啡店,陳豪話:「好初步,就算係都要明年先成事。」問茵媺有冇夾錢?陳豪話冇所謂,隨佢鍾意。
撰文:洪紅克