【北京】
現年38歲嘅內地女星周迅，近日被網友爆料話佢已經秘密結婚，仲有傳佢嘅對象就係湯臣集團二少、董事局副主席湯珈鋮。大家對湯珈鋮可能唔太認識，其實佢媽咪係台灣著名女星徐楓，湯珈鋮間公司除咗做地產生意，仲有投資拍電影，最近劉嘉玲同陳坤套新戲《過界》就係佢哋公司有份投資。不過，湯臣集團嘅人就話冇聽過湯珈鋮同周迅拍拖嘅消息喎。
另一邊廂，周迅日前喺北京俾人影到，當時佢同一位戴眼鏡嘅中年男子同幾位朋友喺間酒店度出現，周迅同個四眼中坑表現得好熟絡。着便服嘅周迅攞住啲文件，喺酒店外面同朋友告別之後，就同四眼中坑一齊坐自己架車走。
逗留至深夜
之後周迅架車直駛東二環一幢高級公寓，周迅同四眼中坑一齊落車入咗幢公寓，到深夜都冇再見過佢哋出嚟，唔知周迅係咪有新戀情呢？相對周迅之前嘅拍拖對象，好似李亞鵬同李大齊咁，今次嘅四眼中坑明顯成熟穩重好多，睇嚟周迅嘅口味都隨住年齡增長而變咗。
撰文：丁寧