畢彼特代言Chanel No.5香水，俾全球網民瘋狂惡搞，更成功引出「高登男神」鄭子誠為「火腩飯青島」的惡搞版配音。如果Coco Chanel仲在生，恐怕佢一定激到生蝦咁跳。Coco Chanel講過：「A woman who doesn't wear perfume has no future.」菲菲雖唔認為女人唔噴香水就冇未來，但無可否認個人對香水確有情意結。家中儲落唔少香水，按心情揀嚟用。當然有唔少用剩，但明知自己以後都唔再掂無謂勉強。浪費？總好過翻用之後，隻味勾起舊男友帶來的不快回憶。女人一旦被一種香味吸引，想佢唔買都難。香水同化妝品一樣，都係長做長有，唔怪得Burberry決定收番呢個業務特許經營權，改為自家管理，拯救公司業績。但呢瓣業務研發成本極高，香水品牌形象建立亦需時，好似香水界經典Chanel No.5，實質已有91年歷史。Burberry想自家香水大紅？睇怕有排等。Fifi本欄逢周二、四刊出