幾時開始，只要你看人不順眼，便能起人底呢？
幾時開始，我們在自己的facebook留言，也要符合其他無關人等的道德標準呢？
幾時開始，我們沒有鎖好門戶，即使被人偷光財物，也是與人無尤，怪不得人呢？
最近那位「五百人情港女」成為城中焦點，電視台都做了一個「結婚你會做幾多人情」的調查。
「人情五百港女」的寸嘴表現，辣㷫一眾網友，除了口誅筆伐，網友更大起底，把港女的生活照、泳裝照、前度情史，詳細列出，連準新郎的資料也一併奉上。這幾天，準新郎也要站出來，向公眾解畫，為了自己未婚妻的不負責任言論道歉。
我的論點很簡單：刑責要相稱。這位港女寸嘴刻薄狗眼看人低，已是公論，也毋須辯駁，但和起佢底，有甚麼關係？古惑仔第一集，浩南問靚坤：古惑仔打打殺殺預咗㗎啦，但駛唔駛冚家×啊！你駛唔駛要大佬Ｂ冚家×啊！
一人做事一人當，港女在言論上犯錯，大家在言論上指罵她即可，但憑甚麼要起人底？你為甚麼覺得，她講錯嘢，我便有權知道她的背景，我便有權公開她的泳衣照？我甚至有權公開她的擺酒地點，還要號召好事之徒要搞串人家的婚宴？
其實關你咩事呢？港女勢利，受罪的最多是她的朋友，關你我他咩事呢？她又不是說「全港市民，如果你去飲俾五百，你就唔係人」，其他人只是觀眾。
最重要是，勢利是錯，但有罪嗎？網民起底過癮，推上報也過癮，但有無想過，一個快將結婚的女子，突然被全城圍攻，還要被全城起底，她能受得住嗎？她憑甚麼要接受這種公審的壓力？如果她出了甚麼事，難道我們可以一句「抵佢死，鬼叫佢咁乞人憎咩」便自圓其說？