在云云內需股當中，只有兩隻稱得上喺基金心目中有難以撼動的地位，一隻係鞋王百麗（1880），另一隻就係百貨股金鷹（3308）。不過咁唔反映佢哋前景必定美好，芬佬其實只是by elimination。因為有番咁上下size、又liquid，又未出現咩醜聞的零售民企，仲剩幾多間？基金錢多要買嘢，點都要有啲內需exposure時，只可以焗揸。金鷹大股東王恆在投資界風評一直頗佳，大家覺得佢能幹、可信。王恆近日在二手市場私人掃入咗7.05%春天百貨（331），市場耳語謂，金鷹未來策略，一定要走收購，因為百貨供應太多已是不爭事實，未來幾年生意唔會有以前咁好做。呢個時候王恆掃春天，實在令市場有唔少聯想。唔好睇王恆喺香港咁低調，佢對資本市場操作絕對有經驗，試過掃貨然後成功逼宮，不過就係A股。王恆04年，曾經11次舉牌狂掃百貨股南京新百，變成大股東入主，期內試過賣資產，但最終因為定價太貴而拉倒。到舊年王恆先突然賣股，退身成第三大股東。王恆為人無寶不落，市場已經開始實呢隻鷹。海迪