商台叱咤樂壇頒獎禮明年1月1日喺灣仔會展舉行，馮仁昭收到風叱咤男歌手金獎未必係陳奕迅（Eason）嘅囊中物，因為許志安、古巨基同Eason一樣有兩首冠軍歌，鍾意玩估你唔到嘅叱咤903，可能隨時畀個金獎安仔。
女歌手方面戰情比較明顯，容祖兒派咗六首歌，蟻多摟死象，其中《正好》係冠軍歌，家仲谷緊《加大力度》，以播放率計應該會封后，薛凱琪、吳雨霏、盧凱彤同G.E.M.就爭銀、銅獎；組合三甲係RubberBand、Mr.、農夫瓜分，雖然軟硬加草蜢有兩首冠軍歌，無奈合唱只計一半分輸蝕咗。
叱咤至尊唱片大獎就由Eason同RubberBand爭個你死我活，Eason因為有三張碟《?》、《ReImagine Leslie Cheung》同《...3mm》分薄分數，反而RubberBand隻《Easy》派咗四首歌，隻隻都上榜，隨時爬Eason頭攞獎；男新人金獎係羅力威，女新人金獎就係台灣嘅陳芳語撼低地頭蟲，佢首《愛你》攞到冠軍歌，以新人嚟講真係好勁囉！