近月零售業生意麻麻，珠寶首飾店更加係重災區，臨近聖誕另一個消費旺季，珠寶商都落力諗計宣傳，聽聞幾間珠寶商正積極爭取贊助無綫今屆視帝、視后大熱門，希望免費做宣傳，提高產品曝光率。
周大福唔吼台慶
真係唔講唔知，舊年視帝鄭嘉穎、視后胡杏兒出席頒獎禮所帶嘅首飾由謝瑞麟（417）贊助，合共總值2445萬，兩人得獎後見晒報，幫謝瑞麟免費大賣廣告。
謝瑞麟首席營運總監陳立業同華華講，揀中視帝、視后純粹巧合，今年會繼續贊助可能得獎嘅藝人，咁到底贊助徐子珊還是楊怡？佢就賣個關子，話今年行家之間爭贊助較舊年激烈，好難講咁話。
之但係，唔係間間珠寶商都恨要呢個免費宣傳機會，周大福（1929）就從來唔主動贊助台慶阿姐、阿哥，事關周大福要求一個高檔定位，台慶唔啱佢形象喎。
至於炒親珠寶股都有佢份嘅六福（590），亦係比較被動，除非有姐仔主動要求借珠寶，否則佢哋唔會做主動。聽聞六福曾經諗過借珠寶畀鄭裕玲呢類比較重量級嘅司儀，可惜Do姐一早被國際大品牌mark咗，最終冇去爭。
無綫今年改用全民投票方式選視帝、視后，除非又發生故障，否則邊位攞獎要講粉絲基礎，珠寶商要扑中得獎者好難啫！
李華華
mailto:[email protected]
