好多打工仔幾乎每日都會鬧一個人，就係佢老闆！外國機構早排做咗個調查，綜合衰老闆五大特徵，大部份認為，相對加人工，有一位好老闆令佢哋工作更開心。
打份工 斷六親
五大衰老闆特徵包括唔畀員工放工、老闆自己冇私人生活，理所當然以為員工都冇私人生活，一唔小心隨時俾佢搞到斷六親。其次係唔識同人溝通，指示唔清晰，員工往往唔知老闆想點。
咪以為乜都攬上身就係好，原來都係衰老闆嘅特徵，佢哋乜都管，唔識下放權力或將工作分畀員工，結果拖低效率，而且乜都管餐懵嘅老闆亦偏向奄尖聲悶，影響士氣。
唔肯做決定同承擔風險嘅老闆亦乞人憎，搵呢類老闆批閱工作，講幾日都未必掂。第五個特徵係情緒易失控，雖然話人有情緒，但做得老闆就要控制吓，如果老闆經常無端端大叫、發脾氣掟嘢，你都真係唔敢行近佢房門口㗎！
衰老闆五大特徵：
1.員工冇得收工
2.唔識同員工溝通
3.乜都管餐懵
4.冇承擔
5.EQ超低