美國總統大選塵埃落定，奧巴馬大熱連任。噚日早段票站調查顯示，羅姆尼得票一直領先，令中港股市一度插水，但中午證實奧巴馬勝出後，股市即掉頭回升，皆因QE3可以繼續泵水也，港股由低位反彈超過200點，相信大家都要接受未來4年低息環境持續呢個New Normal。財庫局局長陳家強早幾日叫大家入市炒股，唐牛覺得終於有特區官員講出心底話。零息政策持續，樓市高處不勝寒，要為資產增值，唔靠股票可以靠乜？當然，如果未來有黑天鵝事件發生（如天災、戰爭等），環球經濟肯定一鑊熟，但短線就要繼續玩股市狂歡派對，先可以自我增值。港交所（388）公佈第3季業績，賺10億銀，按年倒退19%，較市場預期為佳。事實上，港交所今年僅升6.4%，遠遠跑輸大市近兩成升幅，絕對有追落後空間，現價132.10元買入，博一成升幅絕不過份，不跌穿10日線（昨處128.60元）可繼續持有。唐牛