金管局03年底搬入國金二期，55樓成為資訊中心，一星期有五日半免費開放畀公眾人士參觀，係遊客同小朋友學習金融知識嘅必到景點，唔驚唔覺呢個場開咗九年，當局決定趁聖誕長假期間，閉館幾日進行翻新。
更體貼小朋友
最多人瀏覽嘅歷史長廊，同埋貨幣製造流程當然保留。至於有乜新嘢？由於好多小朋友到場參觀，金管局會喺館內加設同小朋友同等視線高度嘅金融知識園地，為香港金融市場培育下一代人才。此外，喺1976至87年嘅港英時代，政府曾發行十二生肖紀念金幣，原作品嘅石膏模型屆時亦會展出。奉行積極不干預政策嘅鼻祖、前財爺夏鼎基，佢位尊夫人正係紀念金幣嘅設計師。舊年參觀金管局資訊中心嘅團體超過500個，逾六成係學生，散客亦有四萬幾人，相當旺場。