亞視擦阿爺鞋唔係新聞,唔知點解呢排特別多攻勢,除咗推出投訴多過收視嘅《ATV焦點》,靠抹黑反國教絕食學生係「破壞派」棋子而吸引市民近四萬個投訴後,有網民發現原來佢哋喺介紹女藝員嘅網頁,都有令人笑到反肚新搞作。話說噚日一個擺明寸中共喉舌報嘅「太公云會報」facebook專頁上,有網民發現亞視網頁介紹冇乜人識嘅06年亞姐季軍韓燕時,國籍一欄竟然填上新疆而唔係中國,網民笑到反肚同時留言,批評亞視「公然支持疆獨真不該」。亞視與其不時推出膠到無倫嘅節目鼓吹港人盲目愛黨愛國,不如先惡補常識,搞清楚乜嘢叫國家好過啦。