蘋機會:美國獨立靠刺客 連動器勢

蘋機會:美國獨立靠刺客 連動器勢

剛剛完結嘅美國總統選舉奧巴馬勝出,雖然你我無份投票,但其實美國歷史一樣掌握喺你手中。講緊嘅係《刺客教條3》劇情。新引擎帶來畫面動作大躍進之外,PS3與PSVita更大玩連動,有特別武器及新人物現身,PS3更有獨家劇情任務,幫美國總統做嘢,係幫華盛頓,唔係奧巴馬呀!

記者:韓繼聰 攝影:楊錦文

遊戲連特別版Connor模型,手工相當靚。$528

遊戲喺香港發佈當日請來Jessica C.扮噴血女殺手。

以同一賬號登入後,即可選用Connor的專用戰斧。

相對來說,升級彈藥袋在實戰中較為實用。

PS連動 女刺客攞斧殺敵

今集《刺客教條3》同時喺PS3及PSVita推出,故事更發生在相同的美國獨立戰爭時空。PSVita遊戲首次以女刺客Aveline做主角,更會在劇情中遇上PS3版的主角Connor。劇情玩Crossover屬基本嘢,兩機連動才是今次過癮之處!
玩家只要以同一賬號登入兩個平台的《刺客3》,PSVita女主角就可得到Connor專用的戰斧及升級彈藥袋。實際試用,戰斧實戰力唔強,勝在夠型,反而彈藥袋就相當實用,但價錢較貴,要儲吓錢買。玩家仲可以用Connor打「New York」任務,連線模式中亦追加能力頗強的「French Agile」角色,雖然無《街霸VS鐵拳》或《LBP》等真正一齊連動玩咁過癮,但都算滿足到Fans。加上遊戲同以PS3版一樣的Anvil Next引擎製作,畫面動作與PS3有得揮,而PSVita的操控更有獨特性,活用了前後Touch芒及體感,個人覺得仲好玩!

女主角Aveline以戰斧殺敵,好有型!

連線模式中追加了能力頗強的「French Agile」角色。

PS3追加 遇見華盛頓

雖然叫連動,但其實連動追加的內容全都在PSVita,不過PS3玩家唔使喊打,PS3版亦有獨佔60分鐘的劇情任務!在追加劇情中,Connor會與後來成為美國首任總統的George Washington見面,更受佢所託去紐約West Point同二五仔Benedict Arnold死過。而遊戲本身亦有唔少新元素,好似新加入如狩獵的小型遊戲,增加趣味。遠近距離的雙武器系統,亦豐富了殺敵的戰略和方式,而今集的海戰場面夠晒震撼刺激。上集網上連線大受歡迎,今集模式更豐富,有四打四、爭據點的「Domination」模式,亦有聯手暗殺鬥高分的「Wolfpack」模式。遊戲更會有中文版,於11月27日推出,想玩得投入啲不妨忍手等一等。

PS3版獨佔60分鐘劇情,主要環繞Benedict Arnold兵變事件。

要喺船上跳來跳去,又開晒大炮,海戰場面好吸引。

話明係刺客,當然要識得潛行狙擊,是遊戲最引人入勝的特點之一。

1.《Assassin's Creed III Liberation》 PSVita特別版同捆裝包括PSVita Wi-Fi版主機,送特別版螢幕保護貼。$2,280
2.《Assassin's Creed III》 PS3同捆裝包括500GB PS3主機,送限量版外套。$2,280
3.《Assassin's Creed III》 $388
4.《Assassin's Creed III Liberation》 $298

《Assassin's Creed III》中文版

PS3/Xbox360/PC
11月27日推出