【中環】
現年46歲嘅歌手關淑怡除咗歌藝聞名外，佢嘅神化行為亦都令人側目。明年舉行個唱嘅關淑怡前日傍晚7點幾又再神遊置裝，同行仲有阿梅以前嘅助手Marianne，佢哋去咗中環ifc一間鞋店。戴住墨鏡着住緊身牛仔褲嘅關淑怡星味極濃。鞋店方面搵咗專人招呼佢哋，關淑怡赤腳揀鞋，佢鍾情一對紫色超高踭鞋，對鞋保守估計都有10吋高。佢着完對鞋就起勢對住塊鏡開始又跳又唱扭屁股，又恍如模特兒上身行貓步，但係凸出個小肚腩就破壞咗現場氣氛。
看海煲煙
揀咗半個鐘買咗兩大袋鞋之後，Marianne同唱片公司高層好友Alex就幫關淑怡攞住兩袋鞋走，佢就行咗去碼頭，佢邊行邊喺手袋攞咗個超大型嘅白色耳筒插落電話聽歌，又急不及待攞咗支煙出嚟煲。見未有船佢就行咗去海邊聽住歌望住海繼續食煙沉思，非常浪漫。
採訪、攝影：陳辰、楊浩賢