之前講過，政府向非本地居民買家徵收BSD，強國人民仍會繼續來港掃貨，一來人民幣貴港紙兩成，畀BSD可以當平水買樓，同時唔少同胞有走資需要，所以呢幾日續有BSD成交，絕對唔出奇。
對於政府話喺非常時期推出非常手段，有戰友就認為，應該將BSD嘅稅收回饋港人，例如用嚟補貼港人買樓畀嘅印花稅。事實上，家上車盤動輒3球，印花稅閒閒哋都要4、5皮，用嚟裝修或買傢俬都好好使㗎喇。
另一樣唐牛估中嘅，就係噚日推介嘅中國全通（633），上周五嗰個大手交叉盤真係由劉央掟出嚟，消息有望增加全通上升動力，有跟進嘅戰友要密切留意。
中芯國際（981）剛公佈第三季業績，盈利1197萬美元，按季增長68%，毛利率更大增逾3個百分點至27.5%，雖然第四季毛利率將回落，但盈利能力料維持，可小注短炒。中芯昨收0.355元，升9.2%，戰友可候回落0.34元吸納，博一成升幅絕不過份。
唐牛