【赤鱲角機場→大坑→干德道】鄭秀文（Sammi）同許志安去咗峇里度假，前晚佢哋預支完蜜月返港，仲刻意前後腳出閘。Sammi前晚9點左右先出閘，雖然佢戴住口罩，但難掩佢滿面春風。
另類情侶裝
問Sammi係咪同安仔去峇里秘密結婚，佢全部唔答，手上亦冇戒指，但見佢戚眉戚眼好開心，當fans想阻記者影相，佢忍唔住笑話：「其實我都想上鏡㗎。」跟住就上咗部七人車。
5分鐘後，安仔亦同Sammi一樣着住有宗教意味嘅黑色tee出閘，成個人都曬到紅卜卜。問佢係咪同Sammi註冊結婚，以及有冇秘密造人，安仔一概冇答，但問佢同女友玩得開唔開心，佢就猛點頭。問佢點解要分開出閘，安仔話：「驚多人。」Sammi部車兜翻入嚟接埋安仔，然後載Sammi返大坑，而安仔就返去干德道。有傳安仔出年做完Big 4演唱會之後，會喺出年暑假同Sammi喺歐洲註冊結婚，之後再返香港補擺喜酒。
採訪、攝影：黃曉程、彭琮然