由黎耀祥、米雪、邵美琪同陳國邦等主演嘅台慶劇《大太監》，前晚首播兩小時版本，平均收視33點（約有211萬觀眾收看)，叫好又叫座。唔少觀眾都大讚祥仔表現出色，亦睇好佢再問鼎視帝，而啱啱做爸爸嘅陳國邦演嘅奸公公彭三順亦得到唔少讚賞，唔少觀眾睇到想摑佢。
責編劇失職
雖然《大》劇製作好認真，好多場口喺橫店拍，不過網民仍然金睛火眼實劇情有乜嘢錯處。話說祥仔喺劇中演晚清著名宦官李連英，首集劇情講佢身份仲係好低微，未成功上位得到飾演米雪嘅慈禧太后賞識。網民篤爆李連英本名李進喜，係得到慈禧重用後先賜名佢做連英，話無綫編劇事前冇做好資料搜集。
但有網民撐《大》劇，話如果編劇跟足歷史，班師奶觀眾就會睇唔明，仲會話：「乜柴九唔係做李連英？」力挺劇組唔改名決定正確。《大》劇監製羅永賢噚日接受電話訪問時解釋劇組知道李連英原名係李英泰，不過唔想叫幾集之後又改名令觀眾混淆，所以先由第一集開始用呢個名。